Заң және тәртіп: Ақтөбе облысында жасөспірімдер қылмысы 25 пайызға азайған
Ақтөбе облысының тәртіп сақшылары қоғамда заң мен тәртіптің сақталуын қамтамасыз ету мақсатында кешенді алдын-алу шараларын атқаруда. Соның ішінде жасөспірімдердің қатысуымен болатын қылмыстардың алдын алу әдістері өз тиімділігін көрсетті. Нәтижесінде өткен жылы облыс аумағында жасөспірімдердің қатысуымен орын алған қылмыстар саны 25 пайызға азайған. Бұл туралы өңірлік коммуникациялар қызметі алаңында өткен баспасөз конференциясында облыстық ПД бастығының орынбасары Ардана Саймағамбетов мәлімдеді.
«Қоғамда балалар мен жасөспірімдердің қауіпсіздігін сақтап, олардың қалыпты дамуы мен әлеуметтенуіне жағдай жасау біздің басты міндетіміз. Бұл тұрғыда ақтөбелік тәртіп сақшылары білім беру мекемелерімен, әлеуметтік қызметтермен, дағдарыс орталықтарымен, денсаулық сақтау, прокуратура және сот органдарымен, қоғамдық ұйымдар, волонтерлік қозғалыстармен тығыз байланыста қызмет атқаруда. Өткен жылы қылмыстың алдын алу мақсатында ұйымдастырылған іс-шаралар өз тиімділігін көрсетіп, нәтижесінде облыс аумағында кәмелет жасына толмағандар қылмысы 25% азайғанын көріп отырмыз. Қылмыс жасағандар мен олардың заңды өкілдері тиісті жауапкершілікке тартылды» — деді Ардана Саймағамбетов.
Департамент өкілі, сондай-ақ, жуырда мопедтерді пайдалану бойынша заңдағы өзгерістер күшіне енетінін еске салды. 2025 жылдың 5 сәуірінен бастап мопедтер ресми түрде механикалық көліктерге теңестіріледі. Енді мопедтер Ішкі істер органдарында тіркелуі керек және оларды пайдалану үшін А1, А немесе В санатындағы жүргізуші куәлігінің болуы, техникалық тексеруден өту шарт. Сондай-ақ, азаматтық жауапкершілікті сақтандырудан өту қажет. Аталған деректер бойынша, бүгінге дейін облыста 667 мопед көліктері тіркеуге қойылды.